加拿大【車牌 · 學車 · 考車】

脂肪仔

https://www.facebook.com/fromhkgtoyyz/posts/578788663052165/

【車牌 · 學車 · 考車】
之前講過喺多倫多生活，有車牌好緊要。所以今次就講講學車同考車，究竟同香港多唔多不同之處？
加拿大同香港開車最大、最明顯嘅分別有兩點：左軚/右軚、行車方向。香港開嘅係右軚車，路面行車方向為左上右落，車輛嘅前進方向為左邊；加拿大就相反，開左軚車，採用右上左落嘅行車方向，前進方向嘅車輛永遠喺右邊。
由於香港車牌係唔可以直接換成加拿大車牌，所以持有香港車牌嘅人都係要喺加拿大重新接受筆試、路試。
安省考車分成三部分，要開私家車、輕型貨車，就要考取G License，考試分為三部分：
• G1 筆試
只要你年滿16歲（work permit / study permit持有者亦可考車牌），通過眼力測試同筆試，你就可以獲得G1牌照。有咗呢個牌照，你需要喺有不少於四年牌齡嘅駕駛者陪同下及指定時段練習開車*，你亦可以去搵師傅學車。
*詳情請參考：
https://www.ontario.ca/....../get-g-drivers-licence......
• G1 路試
得到G1牌照後嘅12個月後就可以考路試，考嘅同香港差唔多，路面駕駛、窄路掉頭、車輛泊位，考試成功後就可以獲得G2 牌照，有呢個牌你就可以喺安省內獨自在任何時段開車。
• G2 高速路試
得到G2牌照後嘅一年可以考高速路試，考試會考返G1試嘅範圍，同埋會考埋行高速路段，要保持適當行車車速同距離。考試成功後會獲得完整牌照G牌。要注意嘅係考取G1牌照後需要喺五年內考取G牌，如果未能成功就要重新開始再考。
考車可以自己報考，或者通過學車師傅到drivetest.ca報名。