安省公共交通資訊

Ryu

係安省每個市(city)/區(region)都有自己嘅公共交通系統，例如多倫多市有TTC、約克區有York Region Transit(YRT)、亦都有安省政府營運嘅Go Transit，服務大多倫多地區，aka南安省金馬蹄地區。大部份嘅公共交通系統都係用巴士營運，只有TTC同Go tranit有鐵路系統。


Presto Card公營機構Metrolinx嘅交通卡，係南安省主要公共交通系統通用。視乎交通公司本身嘅規定，唔同系統之間轉車可能要再比錢。Presto Card可以係車站售票機、網上同埋Shoppers Drug Mart藥房增值。

Ryu

多倫多市嘅TTC係加拿大最繁忙嘅公共交通系統，有四條鐵路線、11條街車線同近150條巴士線。車費為現金$3.25、Presto card$3.20、月票$156、大專生月票$128.15、Presto年票每月$143。TTC系統內轉車係免費，現金比錢要係你比錢嘅地方攞一張轉車紙條，亦即係上巴士嘅時候伸手問司機攞，或者地鐵站入閘後係一部transfer machine攞。Transfer上面有大大隻字寫住日期(278代表今年第278日)同路線，轉車時要出示比司機/車站職員睇。Presto卡比錢可以兩小時內無限次轉車，包括巴士地鐵，以及同路線相反方向(paper transfer唔可以)，上車時拍卡即可。同香港一樣，地鐵來往相反月台唔需要出閘。

圖左係巴士transfer，圖右係地鐵站嘅transfer。

Ryu

大多區大部份地方嘅街道都係井字型設計，多倫多市每條大街都只有一條巴士線南北/東西向行走。例如要由Yonge & Finch搭去Scarborough Town Centre，我地可以搭Finch線(39)向東，係McCowan & Finch交界轉McCowan線(129)向南。路線號碼方面，5-189號線係普通路線(regular routes)、3字頭係通宵線、9字頭嘅係繁忙時間嘅Express routes(亦叫做rocket)，只會停大街交界嘅車站，a同b代表只行走部份路段嘅班次。所有巴士車頭都有單車架，只需要向司機示意就可以將你架單車擺上單車架。係TTC巴士只可以用前門上車，但落車就可以用前/後門。

要注意嘅係，由地鐵轉巴士有時會係地鐵站內嘅付費區轉車，所以上車時唔需要拍卡或出示trasnfer，亦可以直接係後門上車。另外規則上駕駛者係需要讓上完客嘅巴士轉線離開巴士站，大家嚟到加拿大記得唔好帶埋香港個套過嚟，做個禮讓嘅司機。

Ryu

Go Transit係由安省政府嘅公營機構Metrolinx，服務大多倫多地區，aka南安省金馬蹄地區。西至Hamilton同Waterloo、東至杜林區Oshawa同Peterborough，亦包括荷頓區(Halton)、皮爾區(Peel)等等。所有火車線都係由多倫多downtown Union Station出發，部份通勤路線，並非全日/一星期七日運作，甚至只有繁忙時間嘅班次。

巴士線主要係公路線來往各城鎮，又有多倫多國際機場線同各間大學嘅路線，亦會係非繁忙時間代替火車線。Go bus有單層同雙層巴士，全部配有單車架。

Go Transit係用分區收費，用Presto卡上落車都要拍卡

Ryu

約克區交通系統 York Region Transit (YRT)

YRT係多倫多以北嘅York Region提供巴士服務，北至Georgina鎮、南至多倫多同York邊界嘅Steeles Ave，部份路線更加南下到多倫多市嘅Sheppard Ave。 

YRT有六條特快Viva路線，以顏色命名(疫情期間幾條路線暫停營運)，主要行駛Highway 7同Yonge Street。

乘搭YRT可以用現金、Prest卡或YRT app付款

YRT同TTC之間並無轉乘優惠，如果由多倫多市搭TTC到Steeles轉乘YRT住北，係需要另外再比一次YRT車費。但如果係多倫多市內搭YRT巴士穿過Steeles往北，係只需要一程車費。